Նոր Ջուղա թաղամաս
Սպահանի Ջուղա թաղամասը, Սպահան քաղաքի գօտիներից մէկն է, որը կառուցւել է Շահ Աբբաս թագաւորի օրօք եւ քաղաքի Հարաւային մասում է գտնւում։ Զայանդէռուդ գետի եզերքից դէպի հարաւի կողմը բաժանեցին 10 ուղիղ եւ լայն փողոցների, որոնք անցնում էին Նազար պողոտայով։ Այդպիսի վայելուչ դրութեամբ կառուցւեց եւ անւանւեց գիւղաքաղաք Նոր Ջուղան, որտեղ բնակութիւն հաստատեցին Հայաստանից գաղթած Ջուղայեցիները։ Այս նոր գիւղաքաղաքի տարածութիւնը, լայնքով հաւասար է գետի եզերքից մինչեւ Չարսու թաղի, իսկ երկայնքով`Նազար պողոտայի հաւասար է։ Քոչար, Դաւրէժ կամ Մահլաթ, Երեւան եւ Գասկ թաղերն այս գիւղաքաղաքի մաս չէին կազմում, որովհետեւ հայերը Սպահանի քաղաքամիջից դուրս գալուց յետոյ կառուցեցին այդ թաղերը եւ այնուհետեւ այդ մասը կոչւեց նոր Ջուղա, իսկ այս սկզբնական մասը կոչւեց Հին Ջուղա։ Կառուցւած այս Նոր Ջուղան, որ յետոյ հին կոչւեց, ինչպէս երեւում է, սկզբից թաղերի բաժանում չի ունեցել, այլ իւրաքանչիւր փողոց կոչւել է «Տասնեակ» եւ ամէն տասնեակ ընդունել է իր նշանակաւոր բնակիչներից մէկի անունը։ Տասնեակների անունները, սրանք են.– Դիլաքեանց, Մեծ Խոջեց, Փիրմսենց, Գիլանենց, Բաղրամենց, Աւագեանց, Միրմանեանց, Զէքեանց, Իսրայէլեանց, Փանոսեանց, Թօփչեանց, Ջախաթունեանց, Ղօչղարեանց, Թաղվալեանց, Աղիջանեանց, Տէր Անանեանց, Մուշեղեանց, Ղարադանեանց, Աւագ Էդանեանց եւ Դաւթեանց։ Ջուղայեցիների Սպահան քաղաք ժամանելն եղել է 1605 թւին, իսկ Ջուղայի հիմնարկութիւնը 1606 թւին։ Պարսկական աղբիւրներում նշւել է Ջօլֆա անունը, որը Ջուլահ անւան փոփոխւած տարբերակն է եւ հայերէնում կոչւել է Ջուղա։